Sofía Yáñez Perteagudo é investigadora, cartógrafa e artista galega formada en arquitectura, con base en Londres e especializada en análise espacial, cartografía SIX e contornos dixitais.

Aplica ferramentas arquitectónicas e dixitais á investigación de cuestións ecolóxicas e sociais, nunha práctica que abrangue contornos inmersivos, modelado 3D, cartografía, fotogrametría e procesos comunitarios. Interesánlle especialmente as paisaxes rurais, a memoria colectiva e as ferramentas contracartográficas descentralizadas ao servizo da xustiza ambiental e social. Con raíces no rural galego, o seu traballo examina como os procesos extractivos e posindustriais transforman o territorio, e adoita tomar a forma de plataformas web interactivas, filmes e obradoiros.

Entre os seus traballos recentes están o Atlas of the Commons Assembly (Atlas dos Comunais), un proxecto en curso desenvolvido dentro de Organismo 2026 (TBA21–Academy e Museo Nacional Thyssen-Bornemisza) e facilitado polo Centro de Arte Fundación María José Jove; a residencia Territorios Productivos no Espacio Vilaseco, Os Casares, dentro do programa de Fab Lab Barcelona; e Revised Cartographies, un obradoiro que impartiu con Ibiye Camp e Lauren-Loïs Duah no Congreso Mundial de Arquitectos UIA 2026 en Barcelona. En 2026 interveu tamén no Encontro de Artes Novas (EAN). Os seus proxectos anteriores The River of Forgetfulness, A Post-Industrial Galician Landscape e Green Desert forman parte dunha liña de investigación en curso sobre a paisaxe galega.

Traballou como investigadora en Forensic Architecture desenvolvendo exercicios de cartografía e modelado, con Cooking Sections en investigación ambiental e produción expositiva, e como artista técnica e deseñadora urbana en Cross Works. Publicou textos na Fundación Arquia e en La Opinión A Coruña, e o seu libro Feísmo Galego sairá en Edicións Laiovento (2027).

Ten un máster en Arquitectura polo Royal College of Art e un grao (BA Hons) en Arquitectura pola University of Westminster. O seu traballo recibiu unha nominación interna do RCA á RIBA Silver Medal (2023) e foi seleccionado para o premio OlymArts en Atenas.