The River of Forgetfulness:

Este proxecto presenta unha interface interactiva en liña como resposta ao caso de colonización interna de Galicia en España, e investiga varias intervencións construídas durante a ditadura franquista no lado galego do río Limia, e as súas implicacións sociais, políticas e ambientais sobre as ecoloxías e as comunidades no presente.

O encoro de Lindoso serve como caso de estudo do proxecto, xa que se construu na fronteira entre España e Portugal nos anos noventa. Aínda que se levantou durante unha aparente democracia nova, materialízase como a estratificación da lóxica inherente ao sistema colonial, pois naceu baixo leis ditatoriais nos anos sesenta, a través dunha alianza transnacional entre Salazar en Portugal e Franco en España. O concepto de colonia interna fai visible unha poboación que, malia estar enmarcada na rexión central do sistema capitalista, é vítima de modelos de explotación propios das colonias. Iso inclúe o control dos poderes administrativo, xudicial e lexislativo, pero, sobre todo, o proceso de alienación cultural.

O territorio galego foi usado por España como recurso de extracción ao longo dos séculos, baixo o control de capital alleo, o que levou a que non houbese xente galega no poder. A construción do encoro desencadeou novos abusos sobre a paisaxe: obrigou a veciñanza a abandonar a zona, e o goberno democrático permitiu que a industria gandeira estranxeira contaminase abertamente estes encoros, facendo imposible que ningún ecosistema prosperase. As antigas dinámicas de propiedade colectiva do monte foron espoliadas polo réxime e perpetuadas polo goberno democrático en nome do progreso e do capitalismo.

A través da interface, a persoa usuaria pode acceder ás ruínas do que algunha vez foi e ás memorias colectivas e individuais da paisaxe. Como resposta e resistencia a estas políticas, a interface ofrece información xeográfica, como unha análise técnica e rigorosa do mecanismo do encoro, para tentar descentralizar e devolver capacidade de acción sobre estes artefactos que cambiaron vidas. O conxunto de interaccións está deseñado para reforzar a capacidade de acción da persoa usuaria sobre a paisaxe: ao revelar como son e como funcionan estes espazos interiores, redistribúese o poder. Os glitches teñen permiso para existir, xa que o comportamento humano e o da auga conviven no personaxe en primeira persoa.